ភ្នំពេញ៖ យោធិនចំនួន ២រូបដែលបានស្លាប់ក្នុងបេសកម្មជួយសង្រ្គោះក្មេងប្រុសចំនួន ២រូបនៅចំណុចអាងអង្ក្រង ឃុំគោគមន ស្រុកបន្ទាយអំពិល ខេត្តឧត្ដរមានជ័យ កាលពីថ្ងៃទី៣០ ខែកញ្ញា ឆ្នាំ២០២២ ត្រូវបាននាយឧត្តមសេនីយ៍ វង្ស ពិសេន អគ្គមេបញ្ជាការកងយោធពលខេមរភូមិន្ទ ដំឡើងឋានន្តរសក្តិជា ជាកិច្ចបច្ឆាមរណៈថ្នាក់អនុសេនីយ៍ឯក។
បើតាមសេចក្តីសម្រេចដែលចេញផ្សាយនៅថ្ងៃទី៣ ខែតុលា ការដំឡើងឋានន្តរសក្តិជូនដល់យោធិនចំនួន ២រូបនោះ គឺធ្វើឡើងដើម្បីតបស្នងចំពោះការពលីអាយុជីវិតខ្លួនឯង ដើម្បីជួយសង្រ្គោះក្មេងប្រុសចំនួន ២នាក់ដែលបានលង់ទឹកឲ្យរួចផុតពីគ្រោះថ្នាក់ដល់ជីវិតកាលពីចុងខែកញ្ញាកន្លងនេះ។
យោធិនដ៏ក្លាហានទាំង២រូបនេះ ឈ្មោះលោក ឈន ស៊ីដេត ជាយោធិននៅវរសេនាតូចលេខ៤២២ កងពលតូចថ្មើរជើងលេខ៤២ យោធភូមិភាគទី៤ និងយោធិនម្នាក់ទៀតឈ្មោះលោក វ៉ាន់ ថុល ជាយោធិននៅវរសេនាតូចលេខ៤២២ កងពលតូចថ្មើរជើងលេខ៤២ យោធភូមិភាគទី៤។
អគ្គបញ្ជាការដ្ឋានកងយោធពលខេមរភូមិន្ទបានសោកស្តាយ និងកោតសរសើរចំពោះវីរភាពរបស់យោធិនចំនួន២រូបនោះដែលពលិកម្មជួយសង្រ្គោះដល់ក្មេងប្រុសទាំងពីររូប។ អគ្គបញ្ជាការដ្ឋានកងយោធពលខេមរភូមិន្ទចាត់ទុកថា វីរភាពរបស់យុទ្ធជនទាំងពីររូបនោះគឺជាគំរូវីរភាពដល់អង់អាចក្លាហានដែលត្រូវចងចាំជារៀងរហូត។
ជាមួយគ្នានេះ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានផ្តល់ថវិកាដល់គ្រួសារនៃសព ដោយក្នុងមួយគ្រួសារសពទទួលបានថវិកាចំនួន ១០លានរៀល។ បន្ថែមពីនេះ មន្ត្រីមួយចំនួន និងពលរដ្ឋមួយចំនួនទៀតក៏បានផ្តល់ជាថវិកាចូលបុណ្យដល់គ្រួសារនៃសពផងដែរ៕
